Гиристам дар азои худ

Posted by shuhrat on

Хабар дорӣ, ки имшаб бо хаёлат гуфтугӯ кардам?
Худамро бо ҷамоли акси рӯят рӯ ба рӯ кардам.

Нишастам пуштгардон то набинӣ ашкҳоямро,
Ҳадиси рӯзҳои бетуамро мӯ ба мӯ кардам.

Ба даври худ парешон карда авроқи китобамро,
Туро аз байт-байти шеърҳоям ҷустуҷӯ кардам.

Гирифтам гардани худро гиристам дар азои худ,
Ба оби дида дасту суратамро шустушӯ кардам.

Қазо кардам агарчӣ беирода воҷиби хуфтан,
Ба номи ту намози бомдодиро вузӯ кардам.

Ту сангиндил ба нармӣ хуфтаӣ дар бистари роҳат,
Намедонӣ, ки имшаб марги худро орзу кардам!

Categories: Салом.

Ману андешаҳоям