Ману андешаҳоям

Хабар дорӣ, ки имшаб бо хаёлат гуфтугӯ кардам?
Худамро бо ҷамоли акси рӯят рӯ ба рӯ кардам.

Нишастам пуштгардон то набинӣ ашкҳоямро,
Ҳадиси рӯзҳои бетуамро мӯ ба мӯ кардам.

Ба даври худ парешон карда авроқи китобамро,
Туро аз байт-байти шеърҳоям ҷустуҷӯ кардам.

Гирифтам гардани худро гиристам дар азои худ,
Ба оби дида дасту суратамро шустушӯ кардам.

Қазо кардам агарчӣ беирода воҷиби хуфтан,
Ба номи ту намози бомдодиро вузӯ кардам.

Ту сангиндил ба нармӣ хуфтаӣ дар бистари роҳат,
Намедонӣ, ки имшаб марги худро орзу кардам!

© Душанбе, 1 ноябри соли 2013

Зулфи ту печутоб мехоҳад,
Ошиқӣ сарҳисоб мехоҳад.

Дил канорат шабе то субҳ,
Ною чангу рубоб мехоҳад.

Ҷони масти лояқидам боз
Аз ду чашмат шароб мехоҳад.

Шуҳрат аз лабони қанди ту,
Бӯсаҳо беҳисоб мехоҳад.

…Дӯст дошта будӣ маро, ё на?
Ин суолам ҷавоб мехоҳад…

Сурху лолагиву октябрӣ,
Ишқ ҳам инқилоб мехоҳад.

Ба чашми ман ту фавқулода ҳастӣ,
Шабеҳи чашмае озода ҳастӣ.

Ба он лабҳои нозук зери дандон,
Чу гавҳар аз садаф накшода ҳастӣ.

Тамоми рӯзу шаб чашмам, ки бандам,
Худоё, рӯ ба рӯ истода ҳастӣ.

Ту фавқулода, лекин сода ҳастӣ.
Ба доми чун мане афтода ҳастӣ.

Ба поят дил бирезад халқи олам,
Валекин ту ба ман дил дода ҳастӣ.

Ба он шаҳре, ки Шуҳрат шуд гадояш,
Ту шояд охирин шаҳзода ҳастӣ.

© Душанбе. 20 октябри соли 2013

Зимистону баҳору тобистону пойиз…

— Салом, салом, шумо чӣ хел? — гуфтанат,
Ва дасти ман ба дасти худ фишурданат.

— Куҷо будед, чӣ кардаед, ки камнамо?
Ба пурсише канори ман нишастанат.

Зи китфи ман такида гарду чангро
Сари азизи худ ба рӯи он ниҳоданат.

Сипас, ба ғусса гуфтанат, ки вой-вой
Ду ҳафта шуд зи мижа таҳ накарданат.

Барои ишқи як ҷавони хуб, мурданат
Тамоми рӯз, тамоми шаб нахуфтанат.

Ва зоҳиран ба гӯшаи хаёли ту,
Намерасад маро ба қисса куштанат.

Сипас, ба ҷиддият ва ҳарф ба ҳарф,
Хабар диҳӣ ту ногаҳон зи рафтанат.

— Нарав! – Намеравӣ? – Намегузориям
Маро ту зинда бар умеди бозгаштанат.

Ба як саду чиҳил мерасад набзи ман,
Ба чашми ман ба вақти дида дӯхтанат.

Намеравад зи хотирам, намеравад
Ба рӯи ман дари нигоҳ бастанат…

© Душанбе, 5 октябри соли 2013