Мо ва худамон

Posted by shuhrat on 02/02/2013

Чист айби мо, ки дар даври мағал афтодаем?
Зинда, ранги мурда, бе ҷаҳду ҷадал афтодаем.

Марзҳоро дода дасти пасти чанд бефитрате,
Мо зи боло гуфта андар кӯҳу тал афтодаем.

Зери болин буд китоби Ҳофиз андар ҳифзи мо,
Нангамон бодо, ки аз пойи ғазал афтодаем.

Дар муҳаббат пайрави Маҷнуни беақлем мо,
Инчунин девона аз рӯзи азал афтодаем.

Халқи олам даъвии кайҳонкушоӣ мекунанд,
Мо ба беорӣ, бубин, зарбулмасал афтодаем.

Бо ҳама камбуду нобуду набуду нест… нест…
Ин аҷаб корест, дар фикри бағал афтодаем.

© Душанбе, 18.01.2013

Categories: Салом.

2 Responses to Мо ва худамон

  1. Шерзод
    09/03/2013 at 20:55

    Бисёр оли, лаззат бурдам. Ташаккур! Аз Фаргона

  2. shuhrat
    19/03/2013 at 17:42

    Нуши чон! Шодам, ки лаззат бурдаед. Ба мардуми Фаргона саломи моро расонед