Ману андешаҳоям

Ин духтар барои муҳаббат даст ба куштор задааст

Салом дўстони ман!
Агар гўям, ки вақти холӣ камтар дорам ва наметавонам, зуд-зуд ба ин саҳифа навгониҳо ворид кунам, хато хоҳад буд, зеро ҳамин чанд вақти охир тамоман бекорам ва дарк кардам, ки бекорӣ ба кас мисли беморие мечаспидааст. Чандин гуфтаниҳо дорам, аммо ҳавсала ва рағбатам нест. Чаро бояд дурўғ гўям, вақте ҳамин хел ҳаст? Аслан мушкилӣ на танҳо дар ин аст, балки дар пайвастшавӣ ба Интернет ҳам мебошад. Дар ин чанд вақти охир пайваст шудан ба шабакаи Интернет басо мушкил шудааст. Дар ҳамин лаҳзаҳое, ки ин сатрҳоро менавиштам, алоқаи ман бо инет тамоман канда шуд ва ман маҷбўр шудам, ки аз хизмати Microsoft Word истифода кунам.
Мехостам, ки ин пурсиши навбатиро низ ҷамъбаст кунам, чун чанде аз дўстонам ба ман занг задаву аз ҷавоби дурусти ин пурсиш савол мекарданд. Аввал биёед маълум кунем, ки мавзўи пурсиши мо дар бораи муҳаббат буд, ё куштор. Матни пурсишро ман то тавонистам кўтоҳ кардам, то дар саҳифа ғунҷад. Пурсиш ин буд: Духтаре дар ҷанозаи модараш ҷавонеро дид, ки барояш писанд омад. Духтар шабу рўз дар фикри ин ҷавон шуд ва оқибат рўзе хоҳарашро кушт. Чаро духтар даст ба ин амал зад? Барои маълум кардани мавзўи пурсиш бояд ҷавобҳои пешниҳодшударо низ аз назар гузаронем:
1.Мехост бори дигар ўро бинад.
2.Вай маъшуқи хоҳараш буд.
3.Духтар девона шуд.
4.Намедонам.
Чун дар ҷавобҳо дар бораи куштор аслан сухане нест, пас дилпурона метавон мавзўи ин пурсишро муҳаббат гуфт.
Ҳамин тариқ, биёед бинем, ки ба ин муҳаббатпурсиши мо чанд нафар чӣ ҷавоб доданд. Дар ин пусиш ҳамагӣ 17 нафар ширкат карданд, ки ман ба ин нафарон миннатдорӣ баён мекунам. Ба онҳое, ки бо кадом сабабу баҳонае нахостанд ба ин пурсиш ҷавоб гўянд, гуфтаниям, ки дилпур бошед, ҳамааш аз ҳамин хурдтарин саволу пурсишҳо сар мешавад.
Ба пурсиш 10 нафар (59%) ҷавоби «Мехост бори дигар ўро бинад», додаанд. Ҳамаи ин нафаронро табрик мегўем, чун ҷавобашон дуруст аст. Аммо ман ба ҳамаи онҳо ҳамдардии худро мерасонам, зеро мувофиқи тадқиқоти мутахассисон ва рўҳшиносон ин нафароне, ки чунин ҷавоб доданд, маризии рўҳӣ доранд ва бояд аз назари духтури рўҳшинос гузаранд. Ин ба он маъное нест, ки онҳо рўҳан беморанд, балки бо истилоҳ онҳо «психопат»-анд. Ин тоифа низ, агар дар ҷои ин духтар бошанд, барои ҳалли мушкилиашон метавонанд, ки даст ба куштор зананд. Пас, онҳо «психопат» ҳастанд.
Онҳое, ки «Вай маъшуқи хоҳараш буд» (5 нафар, 29%,) ҷавоб доданд, гумон карданд, ки мантиқан ҷавобашон дуруст аст. Яъне, духтар барои ба даст овардани ин ҷавон, ки маъшуқи хоҳараш буд, даст ба куштор зад. Ҷавобдиҳандагон аз мантиқ кор гирифтаанд ва наметавон, ки онҳоро «бемор» гуфт, вале ба ҳар ҳол ҷавобашон нодуруст аст.
Ба «Намедонам» (12%, 2 Votes) гуфтаҳо ҳеч чиз гуфтан намехоҳам, чун намедонам чӣ гўям.
Ҳеч кас ҷавоби «Духтар девона шуд» (0%, 0 Votes)-ро интихоб накард, пас маълум мешавад, ки ин пурсиш аз муҳаббат дур аст. Чун ҷунун нишонаи муҳаббат аст. Аз ҷавобҳо маълум шуд, ки пурсиш ба куштор наздиктар аст, аз он, ки ба муҳаббат.